Tofiq Məlikli

GÜNÜN BIR GÜNÜNDƏ...
(Şeirlər)

***
 
Kimdir, nədir
 
Kimdir, nədir həyatı sevdirən mənə?
Hər səhər
Pəncərəmi döyən
                          günəşmi?
Yuxusundan oyanan
                          çocuğun səsimi?
Yoxsa,
Qış yuxusundan sonra
Yaşıla bürünən
                          ağaclar,
                                      otlar,
                                                  kollarmı?
 
Kimdir, nədir həyatı sevdirən mənə?
Ən ağır günlərimdə
Qurtuluş əlini uzadan
                          bir dostmu?
Yoxsa,
Dünyada bir iz qoymaq
                          həvəsimi?
 
 
Kimdir, nədir həyatı sevdirən mənə?
Günlərdir gözlədiyim
                          məktubu gətirən
                                      poçtalyonmu?
Yoxsa,
Məni yalqızlıqdan qurtaran
                          telefon zəngimi?
 
Kimdir, nədir həyatı sevdirən mənə?
Tanımadığım bir insanın
                                      təbəssümümü?
Yoxsa,
İllərdir qəlbimdə yaşatdığım
                                      sevgimi?
 
Kimdir, nədir həyatı sevdirən mənə?..
 
 
Ayrılıq heykəli
 
Perronda baş-başa qalmış ikisi -
O və ixtiyar vağzal saatı.
Paslanmış əqrəblər
atdıqca özlərini irəli
Daha da uzanır
                          nankor məsafələr.
Qovuşur feilin keçmiş zaman şəkilçisinə
Birgə yaşanmış günlər,
Görüşlər,
Gülüşlər,
Dərdlər,
sərlər...
 
Uzaqlaşan qatarın tıqqıltısı,
İxtiyar vağzal saatının paslı əqrəbləri,
Feilin keçmiş zaman şəkilçisi,
Yaradır
Kimsəsiz perronda
Yeni bir
Ayrılıq heykəli.
 
Çətin iş
 
Dilləndirmə məni, qardaşım,
Danışsam,
Dodağın uçuqlar.
Düşündüyün kimi deyil yaşamaq -
Səhər - yemək,
Günorta - yemək,
Axşam - yemək,
Günün bir günündə də
Uzanıb ölmək.
Başqa şeydir həyat, qardaşım!
Əngəlləri aşmaq sənətidir o,
               qürurunu,
                          mənliyini qorumaq sənəti.
Çox çətindir, bilirəm,
bu sənət!
Çətindir -
Alnı açıq yaşamaq,
Sinə gərmək yalana,
                          alçaqlığa,
Çətindir qorumaq
                          gerçəyi, həqiqəti,
                                      ədaləti, sevgini.
Bilirəm,
Çətindir qorumaq
Səni ana südüylə bəsləyən,
Varlığınla sevdiyin
məmləkətini!
 
 
 
Fərman
 
Bu gecə 
Bir fərman imzaladım:
"Ey, soyuq qəlbli gözəl,
Bu gündən sonra sən
Sevib sevilməyə
Məhkumsan!"
 
Zəngli saatın nağılı
 
Şirin yuxumda
Yeni bir dünya qururam,
                          gözəldən gözəl.
Sərhəd yox olmuş -
                          birləşmiş cənubla şimal.
Hər tərəfdə
Xoşbəxt dost üzlər.
Meydanlar uşaqlarla dolu -
üzü gülər.
Yalan dönüb doğru olmuş.
Rüşvət nədir -
               unudulmuş.
Aclıq,
   işsizlik,
               pulsuzluq,
Sözlükdən silinmiş.
Gerçək olmuş
Utopik bərabərliyi minilliyin.
O olmuş, bu olmuş
               deyərkən,
Xoruzum -
               zəngli saatım -
 banladı,
Yuxudan oyandırıb məni,
Olmayandan
   olana qaytardı.