Mətləb AĞA
Roman şeir

 

 

Hansı ölkəydi, hansı?

bəs neçənci əsrdi?

...orda – o köhnə yolla

bir uşaq tələsirdi...

 

Fikrindən nə keçirdi,

nə tutmuşdu əlində?

nə vardı çiynindəki

o nimdaş  zənbilində?

 

Tanrı hardaydı onda,

ya xeyirxah mələklər?

bilirdilərmi bir gün

Ona nə deyəcəklər?!..

 

...sonra güldü qəfildən,

bütün ağrısı keçdi:

...ovcundasa,

soyumuş

qəlbini gizləmişdi....

 

* * *

Bu il də belə keçdi,

bir yaş da düşdük geri...

...yığmağa yer də yoxdur

dadsız xatirələri...

 

...indi durub özünə

deməyə nə sözün var?!

...hava da boz-bulanıq,

bizdən də duru kim var?!

 

...hər qarışda dirənir

dekabrın şaxtası...

...orda – bir soyuq evdə

yanır dörd sətir yazı:

 

“...maraqsızdı, bilirəm,

bu bitir, o başlayır...

...köhnə ssenaridə,

təzə kino başlayır...”

 

* * *

…Nə xəbər var şəhərdə?

kim piyada, kim atlı...

...fevralın boz soyuğu

hələ ki, salamatdı...

 

...hərdən sular kəsilir,

ya da işıqlar sönür...

...yəqin, fikirləşirsən:

“yaxşı tərk etdim səni...”

 

...yox, heç pis-filan deyil,

bu nisgilli təkliyim...

...cırıb atdım fotonu,

sərçələr dimdikləyir...

 

...sonra qaranlıq çökür,

dayanmadan yağır qar...

...və eyni o əhvalat:

“... qoca Arxip...  Lyonka…