Rəşad MAHMUD
Şeirlər

 

 

OLSUN

Dağı dağ, aranı aran eylə gəl,

Mamırdan, yosundan qoy xınan olsun.

Ömrümə-günümə günəş ol, doğul,

Bizi istəməyən qoy sınan olsun.

 

Vüsal qismət ola qəmin sonunda,

Gedim sabahlara qolum qolunda.

Ömrü qoymuşam ki, sevgi yolunda,

Sən adlı dərdbilən bir yarım ola.

 

Ümid ağacın ək, könlümə əkək!

Bu ömür yükünü gəl qoşa çəkək.

Sınaqlar önündə duraq qalatək,

Baxıb adımızı bir anan olsun.

 

AY QIZ

Bu şəhərin bir başı mən, biri sən,

Bu başda mən, o başda sən, gözəlsən.

Həsrətini çəkməkdən can üzülüb,

Sevinərəm durub yola düzəlsən.

 

Demişdim könlümdə dövlətim, vardı,

Demədim, qəhərim olaydın, ay qız.

Baharda baharım, qışda ağ qarım,

Ömrümdə səhərim olaydın, ay qız.

 

Bilirəm, sevgidə yarımır hamı,

Vəslə yetən olur, xar olan olur.

Eşq adlı ağacın budaqlarında,

Açılıb bir şirin bar alan olur.

 

Bu şəhərin o başından bax mənə,

Bu başında nə istəsən, hazıram.

Sual verib cavabını sorursan,

Mən yazıq da bildiyimi yazıram.

 

SAĞLIĞIMDA GƏLMƏDİN

Baxıram ulduzların

Seyrələn sırasına,

Dünyanın işlərindən

Ürəyim sına-sına.

 

Bir gül üzəcəyəmmi?

Telə düzəcəyəmmi?

Görən, dözəcəyəmmi?

Bəxtin sırsırasına?

 

Göz yaşımı silmədin,

Dərdlərimi bilmədin.

Sağlığımda gəlmədin,

Barı yetiş yasıma.

 

UCA DAĞ

Ey uca dağ, yaşıl meşə,

Cərgənizə qoşun məni.

Sığallasın əsən yellər

Saçlarıma düşən dəni.

 

Qoşulub çayına axım,

Qışına, yayına baxım.

Gül kimi döşümə taxım

Bu kövrək dumanı, çəni.

 

Yamaclar sirdaşım olsun,

Qayalar qardaşım olsun.

İki əl, bir başım olsun,

Kəsilsin pisliyə qənim...

 

GƏLİRƏM

Yar yolu qovğalıdır,

Başdan keçib gəlirəm.

Bulaq kimi qayadan,

Daşdan keçib gəlirəm.

 

Ürəyindən üzülən,

Kirpiyinə düzülən,

Yanağından süzülən

Yaşdan keçib gəlirəm.

 

Aşiqlərin xasıyam,

Mən bir haqq davasıyam.

İlin yaz havasıyam,

Qışdan keçib gəlirəm.