İlham QƏHRƏMAN
BAYATILAR

***

Od vurdum yana kağız,

Halımı qana kağız.

Şair də toxucudu,

İp sözdü, hana kağız.

***

Şirini acı kəsin,

Uzadın, ucu kəsin,

Şəhidin toyu budu –

Xınalı qoçu kəsin.

***

Qanlı gələn Abbasdı,

Hamını oda basdı?!

Şəhidlik busatıdı –

Toy havasında yasdı.

***

Qalx dağdan, yolu kəs dik,

Nə kimsəydik, nə kəsdik.

Toy ətliyi cöngəni

Şəhid vayında kəsdik.

***

Dərya, qırağın hanı?

Gəmi, durağın hanı?

Ayaqqabını sildim,

Oğul, ayağın hanı?!

***

Nədi söylədin, balam?

Məni teylədin, balam.

Qolumdan yapışırdın,

Qolu neylədin, balam?!

***

Mən görən hala mat qal,

Davaya, qala mat qal.

Bir də səni görmərəm,

Göy üzü, salamat qal.

***

Mən görən ahu tutub,

Qan daman oxu tutub.

Gedəndə ayıq idi,

Balamı yuxu tutub.

***

Mən görən yazdan gedir,

Dönüb payızdan gedir.

Şəhid bir anasından,

Bir sevən qızdan gedir.

***

Əl tuturam sıxmırsan,

Ev-eşiyə baxmırsan.

Budu, komandir gəlir,

Əsgər, niyə qalxmırsan?!

***

Çay yatağı əyridir,

Yolu əyri-müyrüdür.

Bizim əsgərdi, çapır,

Tankı attək səyirdir.

***

Həsrətin var, sil aha,

Qabı doldur – silə, ha!

Çiling-ağacı atıb

Sarıldılar silaha.

***

Qar-çovğun sovrum-sovrum,

Gəlmədi mənim yavrum,

Belə nişanı vardı –

Çatmaqaş, teli qıvrım.

***

Muradı xaliq versin,

Dilinə qılıq versin.

Balam onlarla getdi,

Əsgərlər salıx versin.

***

Hasar üstən basa cağ,

Gəl qapını bas, açaq.

Qollu tərəziyə qoy,

Zəfər ağır basacaq.

***

Dünəni aşıq andı,

Qul sakit, asi qandı.

Zəfər nədən əvəzsiz,

Çünki bahası qandı!

***

Gözəllik aşıq salır,

Hissi qarışıq salır.

Qələbə çıraq kimi

Vətənə işıq salır.

***

Telini dara bəri,

Ağ ilə qara bəri.

Varmı elə bir dəyər,

Zəfərin bərabəri?!

***

Hər şirin söz qəlbədi,

Acı saxta, qəlpədi.

Həkim, Qarabağ kimi

Hər tərəfim qəlpədi.

***

Üç rəngdə güllən, bayraq,

Ətirlən, hillən, bayraq.

Qoy düşmənin çatlasın,

Şuşada yellən, bayraq.

***

Ocaqçısan  kömür ver,

Dəmirçisən dəmir ver.

Əsgər gəldi, general,

Dur döyüşə əmr ver.

***

Mən görən belə olsun,

Belədən belə olsun.

Nə qaldı ki, olmasın,

Qoy bu da belə olsun!

***

Necoldu o çağ məndən,

Yanardı ocaq məndən?!

Mən elə sənə sarı,

Sən elə qaçaq məndən.

***

Körpü salan ad salır,

O tay, bu tay yurd salır.

Canan, maşallah olsun,

Cana odsuz od salır.

***

Çayı keç o taya çıx,

Bir səmtə, butaya çıx.

Cana od salan qanlı,

Su götür ortaya çıx.

***

İçimə bir sən sızdı,

Sənsiz dərdim sansızdı.

Tale adlı bağım var,

Heyif, o bağ sənsizdi.

***

Ye, dedim, yemir, gedir,

De, dedim, demir, gedir.

Sən bunda, xəyal onda,

Arada ömür gedir.

***

Dedim, bu yana gedək,

Bizi sayana gedək.

İş yox, güc yox, çörək yox,

Duraq hayana gedək?!

***

Dağdan bir qaya düşüb,

Çobanlar haya düşüb.

Gecə ayamı baxdın,

İşığın aya düşüb?!

***

Yar dolanan bağ olam,

Çırağında yağ olam.

Yellənir, bağdan tutur,

Yelləncəkdə bağ olam.

***

Yıxılmışam tar-maram,

Pay qoyma, aparmaram.

Səndən gələn kədəri

Qapıdan qaytarmaram.

***

İsti buxarı başı,

Nəfin çıxarı başı.

Kədər, xoş gəldin! – yerin

Ömrün yuxarı başı.

***

Sinəndi müşkün yurdu,

Salaydım düşkün yurdu.

Ürəyin adı çıxıb,

Ciyərdi eşqin yurdu.

***

Ustad dedin – meyardı,

Qızılda şərt əyardı.

İş könülsüz olmasın,

Könülsüz iş biyardı.

***

Bir sallan, üç əs, alma,

Sallama küçə salma.

Sevgi könülsüz olmaz,

Ürəyi gücə salma.

***

Çay axar, şırıltı var,

Qar yağar, xarıltı var.

Yazıq, eşqə düşmüsən,

Gözündə parıltı var.

***

Gəl görüm, gülə gələn,

Bülbültək dilə gələn.

Acı təbəssüm olur

Sevgidən ələ gələn.

***

Teli əcəb burmadı,

Qəmzələri qırmadı.

Harda bir nakam eşq var,

Yuvada tək durnadı.

***

Ağladıb gülən qədər,

Gəz qapı dilən, qədər.

Məni özün bilmədin,

Mən səni bilən qədər.

***

Katib yazan sənəddi,

Öyrəndiyin sənətdi.

Məni mən edən fələk

Bir də döndü sən etdi.

***

Çaydı, dərindən gəlir,

Duru yerindən gəlir.

Yaranışdan belədi,

Acı şirindən gəlir.

***

Mən görən yolu gəlir,

Əlləri dolu gəlir.

Yolçu, başına xeyir,

Gurhagur dolu gəlir.

***

Gözümü sıxdım, zalım,

Nə edim? – baxtım zalım.

Məni elə süzürsən,

Dünyamı yıxdım, zalım!

***

Sevməyən kölən deyil,

Dərdini bölən deyil!

Göz yoldan yığılarmı,

Yüz denən, gələn deyil?!

 ***

Ovçusan, qaç, al ovu,

Yenə saldın a lovu.

Bu adlar da sənindi, –

Can odu, can alovu!

***

Meh əsdikcə od əsən,

Könüldə bir oda sən!

Məni kitabda tapan,

O kitabdı, o da sən.

***

Çöllərin lalə yeri,

Göylərin halə yeri.

O ovdu, mən ovçuyam,

Ayağım, hələ yeri.

***

Yaxşı rəhmətə səbəb,

Salam hörmətə səbəb.

İşıq kölgəni doğur,

Sevgi həsrətə səbəb.

***

Havada türk, yerdə türk,

Özgür də türk, hürr də türk.

Döyüş günü biz tərəf,

Bir Pakistan, bir də Türk!

***

Məhləmiz güllə tutdu,

Yar üzün güllə tutdu.

Mənim dilim tutuldu,

Onu nə güllə tutdu?!

***

Evlərin arası var,

Atını ara suvar.

Mənlə aranı kəsib,

Gör kimlə arası var.

***

Bağban bağlara baxsın,

Loğman ağlara baxsın.

Məni kim xatırlasa,

Üzü dağlara baxsın.

***

Bağçalar lalam desin,

Analar balam desin.

Laçına yolu düşən

Məndən də salam desin!